قصيدة زجلية: تَصْهالْ لْعَمْيانْ…
زجل بقلم: عبد النور إدريس
ــــــــــــــــــــــــــــــ
شَبْعات لْغيمة من تَّخْمام….ڴالو
والشّاهَدْ ساوى ميزان لَكْلام
والشّرْجم ما يْدخَّل شمس لْيوم
والشمس ما تًسْخَن غير فْ لَقْصيدة
آه يا وا …
والأرض الجدْبا ما تَحْلا ليّا
وعْنايْتي فْراسي تْبَرْْڴمْ
بْدمعة جايْلَة فْ أرض الله
وراني مْدلّْي عقلي بين الكاف والنون
وضويا فْ عْينيّا
ڴالو لي ادهن السّير
تبكي الصبيان على قْطيع الصُّرّة
ويطيحِ ميزان الذهبْ على حروف الفضة
ڴالو ليّا اكتب بْياضك على سْواد لْمخزن
ترتاح ..
واسْوايع بَدّالا
أو كلمة من غير فمّك ما طَّيَحْ ليك ميزان
وفَمْ لْعيب نابَتْ فيه شوك لْهمزة
شَبْعات لْغيمة من تَّخْمام….
ڴالو…